• 15 di Mai, 2016

  • Dulà: mtb friuli percorsi per bici

  • Fature: mtb friuli percorsi per bici

  • Dificoltât: mtb friuli percorsi per bici

mtb friuli percorsi per bici

mtb friuli percorsi per bici

Zîr, dretis, conseis

Descrizion

Il zîr de pagjine a nol è un anel: si tache e si rive in puescj diferents. Il toc di che pagjine chi al è di Vilac (A) a Glemone.
Par chest al covente un mût par lâ fra i doi puescj; chel ca vin sielt pe comoditât al è il tren bande la Austrie, cusì di podê fâ dut la tornade indaûr in bici, lant di rive sù di Vilac a Cocau, plui e mancul 35 km e scuasit dut di rive jù fin ae fin.

I puescj li che si pues cjapâ il tren a son:
⚫ Udin – Stazion, Viâl Europe Unide. Ore 7:00, partî 7:14. Presit 13.00€ + 3.50€;
⚫ Glemone – Stazion, Viâl Rome. Ore 7:20, partî 7:32. Presit 11.00€ + 3.50€
rivant a
⚫ Villach Hbf – Stazion centrâl, Bahnhofplatz. Ore 8:55.
I presits scrits parsore a son cjolts dal listin de viarte 2016. Di savê, pai grups cun plui di 6 di lôr al è un scont dal 20%. 3.50€ in plui a son pe bici e a son par dut il dì. Il biliet si cjol sul tren.
Par savê di plui: sît Micotra, i documents cun oraris e presits.

Lâts jù dal tren e montâts sù in bici e tache la pedalade: il zîr a nol è par nuie dificil, a no son mûrs, lis rivis sù a lis puedin fâ ducj, ancje chel che nol va in bici ducj i dîs.
Par chest si pues dividi il zîr in tancj tocs e chei chi a son i puescj lì che si pues fermâsi:
⚫ Vilac – Tarvis: ↑ 250 m; → 35 km; 2:30 hh:mm;
⚫ Tarvis – Pontebe: ↓ 190 m; → 26 km; 1:30 hh:mm;
⚫ Pontebe – Cjargne: ↓ 310 m; → 28 km; 1:30 hh:mm;
⚫ Cjargne – Glemone: ↓ 50 m; → 16 km; 0:45 hh:mm;

Lis fermadis a son ta lis citâts cu lis stazions; i timps metûts a valin se un al va simpri vie ator i 10-15 km/h. In chest mût dut il timp che al covente al è di 6:15 hh:mm.

Il zîr di cheste pagjine, di Vilac a Glemone, al fâs part de Ciclovia Alpe Adria, e miôr ancjemò dal sô cuint toc e dal sest toc.

Ancje se dilunc il zîr a son puescj dulà fermâsi, comedâ la bici, mangjâ - come a Ugovize e Scluse - al è miôr puartâsi daûr cualchi imprest: un russac cun dentri un pâr di vistîts, mangjâ e bevi, alc par justâ.

DESCRIZION DAL ZÎR

Il zîr su la Alpe Adrie al tache te citât di Vilac/Villach (A) a li de stazion dai trens, te place Bahnhof.
In pôcs centenârs di metris si rive te place maiôr e daspò sul Flump Drau, che si côr in bande dilunc pistis pes bicis fintremai che si zonte cul Flump Gail. Lant indenant a son piçulis rivis sù e jù su stradelis - ma nuie di ce - ca fasin passâ par puescj ca no si pues dismenteâ. Di visâsi il recint dai Highlander, che si passe a flanc.
Di gnûf su piste pes bicis e a tache la rive sù bande il confin di Thöl/Cocau, cuasi dut ca nol tire sù masse. Si reste simpri tal bosc, ancje se si viodin distès i monts des Alps, come il grup dal Màngart e il riûl Slizza, l'unic riûl talian cal rive al Danubio.
Dongje ae fin dal toc in Austrie si viôt il pas de autostrade, il pasaç da un stât a chel altri. Chi e je une de rivis sù di dut il zîr: si passe il pas propite adalt, lant sù par tornants e voltis. Ancje se no tire sù masse - pensant a chei altris zîrs - a mene rispiet a chei altris tocs de zornade.

Si viôt che si passe da la Austrie a la Italie cuant ca tache la rive jù su la piste pes bicis: i cartei par talian e dome peçs ator jessint cumò dentri tal Bocs di Tarvis.
Dongje di Cocau e je un altre rive sù dilunc strade asfaltade di paîs. Lant indenant fin a Cjamparòs a son altris, ma piçulis e ca no tirin sù: prime ca fos une piste pes bicis a fo une ferade.
Il zîr par navigatôr al à un disviament dal Alpe Adrie cal passe par Tarvis, li che si fermîsi e cjoli alc. Si torne subit ae piste pes bicis, lant vie plui o mancul in plane bande Cjamparòs e passant a Nord da la Mont Sante dal Lussari.
Chei puescj chi a son propit a puest pe mountain bike: di Tarvis al tache il zîr all mountain Tarvis - Lâcs di Fusinis - Rifugjo Zacchi. Lant jù si rive a Cjamparòs, cun ator puescj stupents come la Val dal Bartul e la Mont dal Lussari, li ca passin i zîrs Cjamparòs - Mont di Acomize, Val dal Bartul - Feistritz a.d. Gail - Mont di Acomize, Val dal Bartul - Mont di Ochsenstand e Val Saisare - Mont dal Lussari. Li che si slargje la Val Canal si passe in bande di Malborghet e la sô valade; un ambient di fâ pôre, i puescj e lis viodûdis dal zîr di doi dîs: Malborghet - Ciurciule - Malghe Cucco. Il toc te Val Canâl a Canâl dal Fiêr al è il stes che tal zîr Dogne - Saisare - Alpe Adrie.
Chei puescj chi des Juliis a son un toc dal ConTOUR FVG ca no si pues saltâ, passant chi te cuarte zornade e te cuinte zornade.
Passât il paîs di Cjamparòs e tache la vere rive jù, fin insom. Si va indenant pe Val Canâl dilunc la vecje ferade, cun ator lis Valadis Riûl dal Lâc, Bartul, Saisare, Malborghet e lis cimis dal grup dai Jôf.
Di no pierdi il Bosc di Tarvis, cal è dilunc fûr dutis lis valadis apene dîtis cun i siei 24'000 etars, la plui grande foreste d'Italie. Dentri dut ce cal pô jessi come plantis e bestis.

A Pontebe si passe de Val Canâl a la Val Canal dal Fier, lant alore bande Sud ma no plui tal font de valade ma stant adalt e viodint cusì tantis bielis robis: al tache un dai tocs miôr. Une serie di panoramis, galariis e vecjos puints de ferade, li che si viôt il flump disot.
Te place a Pontebe al è di visâsi cal tache il zîr li che si pedale, cjamine e rimpine: Pontebe - Cason di Lance - Crete di Aip. A no si dismentearan dal sigûr i salts da la aghe dilunc la piste pes bicis, miôr di dutis chê a mieç fra Dogne e Scluse. Di no pierdi, un voli al Jôf di Montâs dal puint disore Dogne. Chei panoramis chi a son ancjemò miôr di chei dal zîr di doi dîs Dogne - Mont di Agâr - Siele di Bielìghe.
Passade Scluse, si va indenant di rive jù e si passe parsore de fontane de aghe di Vilegnove - che si pues rivâ lant jù de piste. Difûr une galarie un altri puint de ferade parsore la Fele, passat chel la piste e tache a stâ dilunc la Pontebane ma stant simpri lontan di chê. Chel puest chi al è ancje la zontadure fra Cividât e lis Juliis te cuarte zornade dal ConTOUR FVG.
In pôcs chilometris si rive a Resiute, li che si pues fermâsi a mangjâ. Li a finìs il prin toc su la ciclabile, almancul fin al 15 di Mai, 2016.

Si passe pal centri dal paîs di Resiute par lâ sù la statâl. Un km su la Pontebane: ancje se a son machinis su la strade, cheste e je cusì largje che no son fastidis.
Une volte a çampe a dîs che si è dongje di Mueç: li si cjape a man drete, passant il puint su la Fele e rivant a Mueç disot, li cal tache il zîr di doi dîs Mueç - Rifugjo Vualt. Juste jentrâts tal paîs si svolte a man çampe, lant indenant su une stradele, dilunc fûr il flump e di chê altre bande de statâl. Al paîs di Cjampiûl si passe dal asfaltât ae strade blancje, ben tignude e ca ducj a puedin fâ.
In pôcs minûts si rive al Puint di Cjargne, li che si dividìn lis Cjargnelis da lis Juliis. Si passe di gnûf il flump, tornant ae bande Est de valade e al paîs di Cjargne. Si jentre dentri, passant in bande de stazion dai trens. Lant fûr si salte ancjemò la statâl lant vie su strade blancje.
Cusì si rive a Puartis. Pôcs centenârs di metris su la Pontebane e di gnûf fûr, su asfaltât par Puartis Vecje.
Une altre volte su la Pontebane, juste par traviarsâle e jentrâ in Vençon.

Si scuèn fermâsi te citât storiche di Vençon. Al è di viodi il domo, cu la sô liende, la glesie des mumiis, il batisteri e la place. Lant fûr si torne ae piste par lis bicis, finîde di pôc, lant vie in plane tai boscs fintremai i Riui Blancs - pont li che si viôt il glereon da la Siele di Ledis, li ca tache le rive jù dal zîr Riui Blancs - Casere Ungarine - Vençonase. Une piçule rampute e po l'ultin toc di rive jù dal zîr, de bande Ovest dal Mont di Cumieli. Chest si pues pasâlu ancje a Est par un toc cal tire sù dilunc une strade blancje, part dal zîr di doi dîs: Riui Blancs - Casere Ungarine - Vençonase. Subit si rive a Glemone, cun parsore il Mont di Cuarnan, che si fâs in bici cul zîr Glemone - Malghe Cuarnan - Siele di Foredôr.
Li di une svolte a çampe si va fûr de piste pes bicis, rivant al asfalt e lant vie drets e in plane, rivant ae stazion dai trenos di Glemone, fin dal zîr.

Il zîr al è lunc in dut 104 km, plui che altri di rive jù e cun plui e mancul 500 m di rive sù, in Austrie, rivant in Italie.
Si pedale cuasi dut dilunc la piste pes bicis, ce cal vanze al è su strade blancje buine e cualchi tocut su statâl, ma distès largje e cence fastidis par chei come nô in bici.
Il zîr al è sempliç, in puescj cuiets, passant dentri o in bande tancj paîs: cusì si pues fâ il zîr vie pe Viarte, la Istât e l'Autun. Stant che la fature e la dificoltât a son bassis, ducj a rivin a fâle.

MTB Friuli al dîs grasie, prime di dut, ae sezion CAI di Tresesin pe organizazion e ae sezion ÖAV di Vilac par sedi vigûts e vênus fat di guide in Austrie. Un biel grasie a Daniele, Jessica, Emi, Raffaella, Carlo, Lorenzo, Catia, Luca, Dario, Antonio, Silvia, Christina e Wolfgang pe pedalade e pe ridadis dilunc le gjite.

Filmât de gite in bici di Vilac a Glemone dilunc la Alpe Adrie.

Colaborazion MTB Friuli - CAI Tresesin - ÖAV Vilac.

Te place di Vilac.

Puint sul Drau.

Alpe Adrie - piste pes bicis in Austrie.

Cuasi dute tai boscs dilunc i flumps.

Su strade blancje.

Dilunc il Gail.

Il pas pes bicis a Thöl/Cocau.

Un dai pôcs tocs di rive sù cun pendence medie.

Rivant a Tarvis.

Un dai puescj dulà fermâsi.

Tal Bosc di Tarvis.

Cun 24'000 etars al è il plui grant d'Italie.

Il Jôf di Montâs, la cime maiôr des Juliis.

Viodût dal puint dongje Dogne.

Salt de aghe dal Riul Perteade, a mieç fra Dogne e Scluse.

Une da lis tantis fra Pontebe e Resiute.

Sul puint dongje Scluse.

Jessint adalt dal font de valade si pues cjatâ aiar su la piste.

Puint de vecje ferade.

Il font dal puint al è in rêt e si viôt la Fele disot, di là dai pîts e da la ruede.