• 6 di Mai, 2017

  • Dulà: mtb friuli percorsi per bici

  • Fature: mtb friuli percorsi per bici

  • Dificoltât: mtb friuli percorsi per bici

mtb friuli percorsi per bici

mtb friuli percorsi per bici

Zîr, dretis, conseis

Descrizion

Une pedalade in puescj di no smenteâsi te Regjon Friûl Vignesie Julie, stupende par chei in bici ma fate di MTB Friuli cuasi dute su asfalt. Juste par chest a vin fat chist zîr, un miscliçot al 50 e 50 di stradelis blancjis e asfaltadis.
Une 50ine di km tes culinis de alte planure furlane, tantis piçulis rivis sù e jù e tal mieç la Mont di Ruvigne, 500 m adalt. Un zîr sempliç e che ducj a puedin fâ, stant che no son grandis dificoltâts dilunc fûr. Si pues fâlu dut l'an. Di che altre bande a son secuencis di rampis e di tocs in plan, cuiets, justis par un bon alenament!
Come dit prime, altris zîrs a son chi dongje: prin di ducj La Acuile dal Friûl, fat par scuvierzi la Regjon. I zîrs su stradis blancjis/asfaltadis a son Martignà - Culinis, Peonis - Val Tochel e Vît - S. Martin. Su asfaltât invezit si pedale dilunc i zîrs Paulêt - San Denêl, Basilian - Ruvigne - Martignà e Curnin - Preon - Cjanâl.

Si tache de place indenant dal Cjistiel di Colorêt di Montalban, parsore di une des primis culinis de alte planure furlane. Si va indenant bande il centri dal paîs, di rive jù, svoltant subit a man drete e daspò man çampe, passant disot la statâl e lant vie po dopo su stradele blancje.
Une desene di chilometris cuasi ducj su strade blancje, tal mieç dai cjamps e cjalant lis culinis li ator, a puartin ae strade panoramiche di San Denêl lant vie dilunc la Ledre. La strade a mene sù, cun plui scjalins, ae place dal domo di San Denêl.
A je cumò la rive jù ca puarte fûr passant pal borc storic. A no si fâs la strade principâl di Ruvigne ma si cjape une altre, piçule, che passe par Pignan, San Jacum e Ruvigne, tornant a cjapâ la strade - che cognossês - rivant a San Pieri, li ca tache le rive sù pa la Mont di Ruvigne.
La salide e va sù di plui e mancul 200 metris cun rive basse e compagne. Tal profîl de altece che si viôt parsore al samee un mûr ma a no je cussì, la lungjece e je di sù par jù 5 km. Di visâsi il cjistiel di Ruvigne, a çampe li ca tache la rive sù, e la viste sul Tiliment e la planure, al secont volt.
Ae fin de rive sù a tache la straordenarie rive jù su asfalt ca puarte a Muris cun volts e tocs drets, biei e svelts.

A no si stâ tant su asfalt: ancjemò dentri tal paîs si volte a çampe pedalant viers il Tiliment, passant a flac des gjavis di Ciman, passant ator de sô culine. Si va indenant su asfalt a Susans, tai boscs e cun parêts di crets a flanc de strade. Di gnûf, jentrant in paîs, si svolte a man drete lant indenant su stradele e fasint un traviers, cjalant lis culinis fatis o di fâ.
Cumò si passe par Maian, rivant al toc in plan dal zîr, tai cjamps su stradelis.
Si rive dongje de rivade, passant a flanc di Mels, Deveà e Laibà. Si finis cuntune rampe, suntun asfaltât stret, cal salte fûr te place dal cjistiel li che si à tacât.

Il zîr al è fat par ducj e par dutis lis stagjons: a no son dificoltâts e al è dut su stradelis.
Lunc 48 km e cun 700 m di rive sù su rivis che no menin sù masse e dividutis in tocs al massim di 200m.

MTB Friuli al dis grasie a Nirvano, Claudio, Mauro, Cristian, Carlo e Alessandro par sedi vignûts e pe compagnie.

Fûr di Colorêt di Montalban.

Daspò sù par jù 10 km su stredelis blancjis.

Viers la Mont di Ruvigne.

La viste su lis Alps Furlanis dilunc dut il zîr.

A flanc dal Ledre.

Si rive di scuindon a San Denêl.

Il Domo di San Denêl.

Il zîr de place e dopo jù a Pignan.

Di gn tai cjamps.

Denant la Mont di Ruvigne, li che si va.

Il Cjistiel di Ruvigne.

A çampe te rive sù pa la Mont di Ruvigne.

Cjalant la plane da la Mont di Ruvigne.

Fra i paîs di Muris e Ciman.

Il Tiliment al côr disot, pocs metris plui in la.

Tal traviers fra Ciman e Susans.

Dongje la rivade.

Passat Mels si va vie su asfaltât e la rampe ae fin.