• 22 di Avrîl, 2017

  • Dulà: mtb friuli percorsi per bici

  • Fature: mtb friuli percorsi per bici

  • Dificoltât: mtb friuli percorsi per bici

mtb friuli percorsi per bici

mtb friuli percorsi per bici

Zîr, dretis, conseis

Descrizion

Un zîr parsore di chei altris, nature e storie ca no si puedin dismenteâ.
Si tache di Glemone rivant al sô centri storic, passant in bande al cjistiel e jentrant pa la puarte orientâl. Si disfilie il Domo di Sante Marie e po i rudinaçs da la glesie de Marie da la Gracie, lant indenant dilunc la Alpe Adrie. Vie pai boscs si rive a la citadine di Vençon, saltant fûr in centri cence inacuarzisi. Par fâle curte, il zîr Glemone - Lâc di Cjavaç al passe a viodi il Domo di Sant Andree, lis mumuiis - dal XVII secul conservadis da la nature - e la Place dal Municipi, cul sô palaç e la fontane.
Tabaìn alore de nature, che no je stade tocjade dilunc dut il percôrs. Apene fûr Glemone si vâ vie per une stradele viers il Lâc di Minisin e i boscs, plens di arbui e plantis. Lant indenant si travierse il Tiliment e po si côr in bande la grave li che si metìn adun la Fele e il Tiliment. Simpri tai boscs si rive fûr parsore dal Lâc di Cjavaç, viodint la limpidece da la aghe. Daspò si vâ jù, passant pe zone basse dal palût, li che si viodin cesens, masurìns e tancj ancjemò, plui i pes disot i puints. Ma a no je finide chi: passât Tarnep e lant jù a Bordan si pues viodi il museu: la Cjase da lis Paveis.

Viodudis dutis lis robis di chescj puescj, a son plui zîrs di MTB Friuli ca rivin o passin par chi: la Alpe Adrie - di Vilac a Glemone al finìs li cal tache chest zîr ca. Lis primis montagnis a vegnin esploradis dai zîrs Dalès - Malghe Cuâr e Peonis - Val Tochel invezit i zîrs Riui Blancs - Val Vençonassie e Glemone - Malghe Cuarnàn a van plui adalt. I zîrs Magnan - Mont di Faeit e Magnan - Troi a fasin viodi il percôrs dal Glemone - Lâc di Cjavaç. Par ultin il zîr di doi dîs Remanzâs - Tanamee - Vençonassie che al dopre il prin toc di chest zîr par tornâ indaûr te seconde zornade.

Si tache dal parc da la stazion dai trens di Glemone. Su asfalt si vâ sù cence tante fature al centri storic, passant in bande dal cjistiel e jentrant pe puarte orientâl. Cualchi centenâr di metris in plan par traviersâ il borc e po le rive jù ca puarte fûr di Glemone.
Cuant che la rive jù a tache a splanâ si passe a flanc dal Molin Coccon, subit si svolte a man drete dilunc une stradele. Si è cumò fûr dal paîs e dentri tai boscs. Si passe in bande dal Lâc di Minisin tornant daspò indaûr. Si rive alore a Ospedâl a li che si cjape la Alpe Adrie. Une piçule salidute e po si vâ indenant su puints, asfalt e stradelis fin a saltâ fûr, cence savê, a Vençon.

A no si pô no fermâsi. Il percors al salte la Pontebane jentrant tal paîs e rivant a lis muris, si cjape po par il domo e par lis mumiis. Si rive alore ae place, cjalant il Palaç dal Municipi e la fontane, e daspò ae statâl. Si va indenant pal parc rivant al passaç pedonâl. Su asfalt si rive a Piluver dilunc il puint sul Tiliment. Si va fûr subit dal paîs lant vie bande Nord e cjapant la piste pes bicis che fâs zirâ ator dal Mont di San Simion.
Plui e mancul dîs chilometris in plan dentri tal bosc, simpri a flanc dal Tiliment. Si rive insomp intun plaçal, dongje de statâl viers Somblât.

Si la cjape, e je dut câs largje e cun pocjis machinis. La rive sù a la siele e daspò la rive jù al prin tornant a son in dut 1 km. Al prin volt a man çampe si lasse la statâl cjapant la stradele ca puarte, dopo une volte indaûr, al paisùt di Mene. Di chi si vâ jù di corse a Somblât, travierant il centri. Si passe la statâl tornant ae strade blancje e rivant a un vecjo puint in piere disore un riûl.
Di gnûf su asfalt si cjape e po di pedale la stradele - aromai cuasi dome pes bicis - che cûr adalt e a Ovest dal Lâc di Cjavaç. A la fin dal lâc si svolte a çampe rivant a la svelte al troi cal fâs scuvierzi e cjalâ la palût.

Si va indenant cumò su la bande a drete dal lâc, lant sù su asfalt a Tarnep e daspò a la siele bande il paîs di Bordan. Tacade la rive jù, subit a la si bandone, cjapant una stadele blancje. Piçulis rivis sù e une biele e svelte rive jù a puartin a Bordan.
Une volte traviersât il paîs si è di gnûf te nature, lant vie prime su stradele e po su un troi plui e mancul in plan. Si passin doi vâts, par solit cence aghe, par rivâ ae galarie. Si passe par fûr, simpri dilunc il troi. Una scjalute in jù a puarte al paîs di Braulins.
Si rive alore ae çampe dal Tiliment, lant indenant pal borc di Pinete e rivant tal ultin ae stazion dai trens.

Si pues fâ chist zîr dut l'an, a no son dificoltâts o tante fature. Il troi in mieç a Bordan e a Braulins al ven tignût ben e a no varessin di sedi fastidis.
Il zîr al è lunc 41 km cun 450 m di rive sù.

Il domo di Sante Marie.

Carateristiche di Glemone, si pues jentrâ a viodîle.

La prime stradele lant fûr di Glemone.

Si rive al Lâc di Minisin par tornâ daspò a Ospedâl.

La Alpe Adrie.

Il passaç di Glemone a Vençon.

Rivant a Vençon.

La citât dal XIII secul miôr tignude in Italie.

A flanc des muris, il batisteri cu lis mumiis di Vençon.

Scuviartis tal 1647 a forin tignudis in mût naturâl.

La ponte dal cjampanili dal domo di Vençon.

Une biele storie a conte cemût ca e je nassude, che si viôt ancje vuê te sagre dal paîs.

Il municipi di Vençon.

Di butâ un voli ai orlois e lis statuis di Vignesie e dal Friûl.

Il Tiliment.

Rivant al Mont di San Simion.

La piste pes bicis ca puarte di Piluver a dongje Cjavaç.

Plui e mancul in plan, cun in bande parêts, boscs e la grave dal Tiliment.

Tal paisùt di Mene.

Si tache a viodi la valade e il Lâc di Cjavaç.

Lant fûr di Somblât.

Un vecjo puint in piere.

La strade dilunc fûr il Lâc di Cjavaç.

Propite cun pocjis machinis ca passin e bielis viodudis.

Il cjanton a Sud dal lâc.

Al samee a une palût, si passe par là dopo.

Te riserve dal Lâc di Cjavaç.

Si viodin cesens, masurìns e tancj ancjemò.

Il puint pes bicis.

Il passaç di une bande a che altre dal lâc.

Il toc viers Tarnep.

Stade largje, ca no mene sù tant e cence masse machinis ca passin.

La siele a mieç fra Tarnep e Bordan.

Subit dopo vê tacât a lâ jù si svolte a man drete par cjapâ une strade blancje.

La stradele, toc dal zîr des paveis.

Une piçule rive sù tal prin e daspò une biele e svelte rive jù.

Passât Bordan si vâ indenant su stradele e po dilunc un troi.

Si rive a fâ dut in bici e par solit al è tignût ben.

Rivant a Braulins, di che altra bande da la galarie.

Chel te foto al lasse passâ fûr de galarie, podint cjalâ ancjemò il Tiliment.