• Istât/Sierade 2015

  • Dulà: mtb friuli percorsi per bici

  • Fature: mtb friuli percorsi per bici

  • Dificoltât: mtb friuli percorsi per bici

mtb friuli percorsi per bici

Zîr, dretis, conseis

Descrizion

Il ConTOUR FVG al è un zîr di no crodi: pensât par jessi fat in 9 dîs e che al fâs l'ôr de Regjon Friûl - Vignesie Julie, cun cualchi chilometri in Slovenie e tal Venit, plui lâ a ôr dal confin cu la Austrie a Sud dal Cogliàns.

I puescj là che si passe a son tancj e diviers: la pagjine su la nature a conte a le svelte ce che si viôt. In 9 dîs in bici si passe dal lît di savalon, al Cjars - in piere alte sul mâr, ae plane e al Cuei, plen di vignâi. Daspò si rive ai monts, lant sù di altece, pedalant su lis Alpis Juliis e Cjargnelis: diviarsis fra di lôr ma dutis dôs bielis pai boscs e prâts che si cjatin. A no si puedin smenteâ lis cimis che il ConTOUR FVG al passe in bande tai 9 dîs.
Si tache alore a tornâ indaûr viars l'inizi, passant pal Cjadovri, puest famôs pes Dolomitis, rivant daspò al Bosc dal Cansei e lant jù ai Magrêts dal Midune e dal Ciline. In pôs chilometris si rive a lis risultivis, lant indenant viars la lagune di Maran e rivant po a li che si veve tacât, sul mâr.

In plui, il zîr al passe par tantis citâts de storie de Regjon, cul timp che al cuvierç i ultins vincj secui. La storie di contâ e je propite lungje e e je scrite te pagjine fate apueste: ConTOUR FVG Storie. Dut al tache cu le storie dai marinârs, che si viôt dilunc fûr la prime zornade, li che si passe par Grau, Duìn e Opicine. Si va indenant sul Cjars, puest de batais de Grande Vuere, rivant daspò a lis culinis, libri des storiis di une volte, che si viodin a Rosacis e Cividât, patrimoni dal UNESCO. Si rive dopo ai monts, li che la storie chê si viôt e je dal ultim secul, plui dure di chei altris puescj. Lant fûr des Dolomitis si passe par Longaron, citât de tragjedie dal Vajont, lâc che si passe in bande. Si torne di gnûf te plane passant pai paîs storics di Polcenic, Voleson - spieli de storie de ete di mieç, la Vile Manin, magnific palaç dai venezians. Si siare dut cu 'nt une fermade, che si scuen fâ, a Aquilee cui rests, il museu e il stupent domo dai romans.

 

L' atac al è dongje dal puart di Grau in Provincie di Gurize. Si va vie prime su lis rivis e po si va in dentri, cul lît a drete e la lagune a çampe. Si passe po pe Isule di Cone, li cal Lusinç al jes tal Adriatic. Subite si rive a lis rivis sù ca puartin al Cjars, cueste alte e di piere sul mâr cal sta pôs metris al disot, te Provincie di Triest.
Lant vie simpri adalt si passe parsore de citât rivant a le bielissime e cognossude Val di Rosandre su la piste pes bicis "Cottur". Si va fûr par moment dal cunfin cu la Slovenie, tornant subite tal Cjars talian, lant vie bande Nord dentri tes culinis e no sul mâr, come fat prime.

Il secont dì al è tal dentri dal Cjars lant vie viars Nord, dilunc fûr il cunfin cu la Slovenie su culinis e monts, tornant viars il centri de Regjon. Su lis culinis dal Cjars si torne te Provincie di Gurize, lant vie lunc lis trinceis de Grande Vuere. Si rive alore te plane e po dopo al paîs di Cormòns, cun ator i vignâi e il Cuei; un dai puescj miôr e je la Badie di Rosacis. Si pedale bande Nord vie pai cjamps, viars lis montagnis, rivant a la Provincie di Udin e a Cividât, citât storiche UNESCO dai Celtics e Longobarts.

Si va indenant il tiarç dì te Val dal Nadison, fin dongje a Pulfar. Tache alore le rive sù viars il Mont di Joanis, mont no tant alt viodint chês in bande ma cal lasse viodi dai panoramis bielissins de nestre planure, plui di une volte. Il zîr nol passe pe cime ma al fâs il zîr prime a Est e po a Nord dal mont, rivant daspò a lis Juliis cun rivis sù e jù ca puartin, ae fin, a le Val de Tor. Ancjemò cualchi chilometri su la statâl cun pocjis machinis e dilunc al canalon de Tor, fin dongje dal Pas di Tanamee, fin da la zornade.

Te cuarte zornade si vâ, su asfalt, sù al Pas di Tanamee, jù al paîs di Ucee e di gnûf sù al Carnize. Une volte li si jentre tal Cjanâl di Resie e si tache a lâ jù: la strade a mene jù, tocs drets e voltis, plui dai bielvedê che si visîsi. Rivâts insomp, a Resiute, si svolte a man drete cjapant la piste pes bicis Alpe Adrie, ex ferovie. Par cheste reson a no tire sù tant e di adalt si viodin i salts da la aghe e i puints, plui al è un puest par fermâsi a polsâ.
Lant indenant si cjale ben la Fele di adalt e po si rive al paîs di Dogne, li che si lasse la ciclabile e si tache la rive sù su asfalt viers Sompdogne. Plui e mancul 18km cun ator parêts, boscs, glereons e la parêt Nord dal Jôf di Montâs a drete che, cui siei 2753m, e stâ adalt des Juliis talianis. Rivâts in Sompdogne, ancjemò cualchi minût su strade blancje par rivâ al Rifugjo Grego, fin de cuarte tape.

Dal Rifugjo Grego si tache a lâ jù te cuinte zornade, prime su troi larc e po su strade blancje te Val Saisare, li che bas si à dut ator lis cimis dal Grup dal Jôf che si viodin di dentri dal Bosc di Tarvis. Rivâts a Valbrune si cjape di gnûf la piste pes bicis Alpe Adrie, lant jù a Pontebe. Lavîe si tache di gnûf a lâ sù, cu 'nt une biele rive sù su asfalt bande il Cason di Lance, strade pôc traficade. La strade a mene sù, ma ce che si viôt su adalt al fâs pasâ la fature fate: il Mont di Zermule cul Zuc da le Vuardie e la Crete di Aip.

La seste zornade e je che plui dure: il prin toc al va dal Cason di Lance a Paulâr, di rive jù su asfalt, par lâ sù daspò a Liusûl e traviersâ su strade blancje lant bande Paluce, dentri tes Alpis Cjargnelis. Si va vie su stradelis cence pasâ pal paîs e cjapant po le strade pal Pas di Mont di Crôs su asfalt, un miscliçot di stradis statâl e di paîs.
Lats fûr dal paîs di Tamau e tache la cleve su strade blancje viars il Rifugjo Marinelli, prime dentri tal bosc e po fûr tai prâts des malghis. La stradele a tire sù ben e no mâl sul varsant Sud dal Grup dal Cogliàns, cunfin Italie-Austrie.
Po vêlu traviersât, e je la ultime rampe, dôs bielis voltis indaûr su troi cui ultins 100m di rive sù ca puartin a Forcele di Morarêt - Rifugjo Marinelli, 2122m, il puest plui adalt dal ConTOUR FVG.

Il dì dopo, settim toc dal zîr, si tache lant di rive jù dal Rifugjo Marinelli al Tolazzi su strade blancje; e po asfalt fin al paîs di For Davuatri. Si tache di gnûf a lâ sù par asfalt-strade blancje-troi fin a Cime di Sapade dulà che si torne su strade blancje fra prâts e boscs des Dolomitis, tal Venit de bande Nord dal Mont di Siere e dal Clap Grant.
Passâde Sapade si cjate la maravee dal Orrido dal Acquatona, che si passe parsore su di un puint di len: scugnî fermâsi! Dopo a son decinis di chilometris di rive jù.
A flanc da la Plâf, tal Cjadovri, su une vecje strade di asfalt, si passe in bande dal Lâc dal Tudaio. Cualchi chilometri su statâl par cjapâ la piste pes bicis a flanc dal Lâc dal Centri Cjadovri, cu 'nt une biele cjalade a lis cimis des Dolomitis li ator. Si rive alore a Longaron; si torne a lâ sù su asfalt rivant al Lâc dal Vajont. La strade a no tire sù e no va a straps, e je largje e a puarte a la Val dal Vajont. Simpri su asfalt si passe fûr Nert rivant al Pas di San Svalt, tacant a lâ jù di corse, rivant in un lamp a Cimolais.

L'otâf dì si va jù su asfalt al Lâc di Barcis, in bande dal Ciline e i monts li ator. Rivâts al lâc si svolte a man drete sul puint pes bicis par po tacâ le rive sù, su asfalt, ca puarte a Plancjaval cun tocs drets e tornants dilunc la Val di Caltea. Ae citadele turistiche di Plancjaval si va indenant su la strade panoramiche dal Bosc dal Cansei, rivant a viodi fin al mâr. Si va jù su strade blancje fin insomp, viodint simpri dut la plane e i puescj li che si passarà tal doman. Rivâts al paîs storic di Polcenic si torne su strade blancje fin a Lavorêt, aromai te plane.

La novesime zornade, pensade come la fin dal zîr, la rivade dal ConTOUR FVG, a passe pes Provincis di Pordenon, Udin e par ultin Gurize, tornant a li che si veve tacât te citât di Grau. Un daûr chel altri, tancj tocs di asfalt e piste pes bicis, fin a rivâ ae grave dal Midune e dal Ciline tal ambient dai magrêts, passant po pal centri storic di Voleson e, di fûr, i vignâi dilunc la strade fin al puint sul Tiliment. Subit si passe pe storiche Vile Manin; si rive po a lis resultivis pedalant su strade blancje, ca no si smentein lis bestis e lis plantis. Lant indenant si rive po a le basse e a la lagune e si viodin i paîs di une volte, li che si torne a cjapâ la piste internazionâl pes bicis Alpe Adrie. La piste a puarte ae citât di Aquilee, li ca il percors al va fûr de piste e al jentre tal centri storic, patrimoni UNESCO, ca no si po no fermâsi a viodîlu pe so bielece, maestositât e la cualitât ma soredut la storie cal conte. Il percors al torne di gnûf su la piste pes bicis, passant in bande de Lagune di Maran e rivant in pôc timp a Grau.

 

ConTOUR FVG al è duncje un zîr di 9 zornadis ca ti fâs fâ il zîr ator ator de Regjon Friûl Vignesie Julie, in un mix di asfalt, stradis blancjis e trois, viodint ancje tantis citâts storichis, nature e ambients bielissims ma soredut dai panoramas ca no si smentein.
La robe miôr fra meteo - che si intint cjalt e frêt, ploe o nêf - e mût di lâ vie - pensant al trafic e cetante int ca je in montagne - par fâ i 700m di lungjece e i 12'000m di rive sù si consein i mês di Giuin e Setembar.

mtb friuli percorsi per bici

Dì 1.

De Isule di Grau al Cjars dilunc la cueste de Marine di Triest, il toc plui a Nord dal Mâr Adriatic.

mtb friuli percorsi per bici

Dì 6.

Tes Alpis Cjargnelis rivant al Rifugjo Marinelli, pont plui adalt dal ConTOUR FVG, li dal Grup dal Cogliàns.

mtb friuli percorsi per bici

Dì 7.

Lant fûr dal Friûl Vignesie Julie e jentrant tes Dolomitis, tornant di gnûf dentri in Regjon pe Val Ciline.

mtb friuli percorsi per bici

Dì 8.

Di rive sù al Bosc dal Cansei cul panorame sule plane e fin sul mâr tal Friûl e tal Venit.

mtb friuli percorsi per bici

Dì 9.

Tornant al atac dal ConTOUR FVG passant par tancj puescj storics e particulârs ambients naturai, cun une fermade al centri, patrimoni UNESCO, di Aquilee.