Parençane: un viaç di trê dîs tacant de Marine di Triest, il cjantòn Nord-Est de Italie, lant a scuvierzi l'Istrie fra ce cal è dentri, fra vignis e boscs, e ce cal è sul mâr, fra pieris e citât storichis sul mâr.

Si vâ vie dilunc la vecje ferade dal imperi Austiac-Ungaric vierte tal 1902 e sierade tal '35 che e puartave di Triest a Parenç (HR). Chest al vuel dî che lis rivis sù 'nd àn pendence simpri sot dal 5%, lant vie fasint lungjis curvis su lis culinis.
Il meti a gnûf tai ultins 50 agns al à purtrop ruvinât plui di un toc de "strade ferade", chest nol va a gjavâ bielece al percors, anzit a nus puarte in puescj lì che i trenis no rivavin.

Ancje se a viodîlu cussì al samee cal sedi propit sempliç e che si fâs cence fastidis, lis distancis e soredut i puescj dulà podê fermâsi a complichin il rivâ a fâ la Parençane.
MTB Friuli al è chi par meti adun insieme l'itinerari.
Per informazions, curiositâts e fâ adun cheste imprese:

  Scrivinus!

Il viaç al è fat di trê tocs:
- Triest - Portorose, 57 km, 570 m;
- Portorose - Montone, 60 km, 520 m;
- Montone - Parenç, 34 km, 230 m;
TOT: 151 km, 1320 m;

Lis lungjecis no son compagnis ducj i dîs; chest al è par vie dai puescj lì ca si pues farmâsi a durmî e pal podê rivâ insomp in mût di tornâ a Triest in zornade.

Si tache de stazion di Triest, in plui e mancul 15 km si rive al cunfin cu la Slovenie lì che e tache la vere ciclabile cun tocs tai cjaps, tocs dilunc il mâr e tocs tai centris storics. Lant fûr di Portorose si rive intun lamp in Cravuazie, a lis stradis blancjie, a tocs luncs pardabon dentri tal nuie e cence cjatâ paîs.
Il viaç a vâ a sierâsi passant dentri tes culinis de Istrie e rivant ae sô cueste, lant jì a Parenç e al so bielissim centri storic e sul mâr.

Si vâ simpri vie sù ciclabilis, stradelis blancjis o asfaltadis. Nissun toc su stradis cun tant traffic o scuvierts o pericolosis. Di visâsi ancje che fûr de Italie lis stradis no 'nd àn plui dutis lis protezions a flanc, ancje sul ôr dal mâr. A son mancul ancje i puescj e i paîs dulà cjatâ di bevi o mangjâ. No dismenteâsi ancje i mussant, tancj amancul cuant che al è lât MTB Friuli.

Sierant, la Parençane e je un percors par dutis lis bicicletis, lis esperiencis, i alenaments. Lant vie in mountain bike al è sigûr miôr che cun chei altre fate, sintint di mancul la glerie. Si pues ancje fâle cun lis bicis di viaç, metint miôr i pês: chest colp sù la bici e no sù la schene.
Nol è nissun toc lì cal coventedi savê cemût movisi, dislivei e pendencis a son mediis, nì masse dûrs, nì masse lizêrs. Distes, un frecul di esperience e covente.
MTB Friuli al dîs gracie a Lucio, Alfio, Fulvio, Luca, Beppe e Simona par sedi vignûts e, soredut, pe compagnie ca je nassude.