Percors e Itineraris in Friûl Vignesie Julie
Alpe Adria
MTB Friuli
Devente soci
26 di Jugn - 2 di Lui, 2023
Dulà:
Fature:
Dificoltât:
Cjarte Tabacco: /
Ce ise?
Il non al displee za par so cont il sens dal viaç: Alpe (lis monts) - Adria (il mâr) e al salte fûr de storie dai puescj indulà che al passe.
Il viaç al vâ de citât di Salisburc, tal confin a Nord de Austrie cun la Gjermanie, e Grau, su la isule a Sud dal Friûl e te ponte parsore dal Mâr Adriatic.
Lis fermadis a son statis fatis in mût di fâ l'Alpe Adrie cu la tende, lant simpri indulà che si pues doprâle. Distes, e si pues fâle ancje cun hotel, gasthof, B&B,..., cambiant par tô cont i zîrs.
Di savê che il percors di MTB Friuli al à ancje des piçulis deviazions dal zîr uficiâl, juste par lâ a viodi i centris des citâts.
Altre robe e je che l'Alpe Adrie si pues fâ di dutis dôs lis bandis, tant di Salisburc a Grau che al contrari. MTB Friuli al à decidût la prime opzion cussì di fâ de bande juste certs pas e il simbolic "tornâ in Patrie".
L'Alpe Adrie di MTB Friuli è stat fat par rivâ insom intune setemane: 7 zornadis in siele, cun la prime e la ultime zornadis plui curtis, di mût di podê vê timp di movisi al pont di partence o di arîf.
Disot il svilup dal viaç fat in 7 dîs:
Zornade | Lungjece L (km) | Dislivel di rive sù D+ (m) |
---|---|---|
1e Zornade: Salzburg - Hallein | 17 |
50 |
2e Zornade: Hallein - Sankt Veit im Podgau | 59 |
400 |
3e Zornade: Sankt Veit im Podgau - Obervellach | 50 |
800 |
4e Zornade: Obervellach - Villach | 77 |
400 |
5e Zornade: Villach - Scluse | 72 |
450 |
6e Zornade: Scluse - Udin | 76 |
350 |
7e Zornade: Udin - Grau | 56 |
50 |
In dut | 406 |
2400 |
Si scomence ae stazion di Udin cussì di sedi sù a Salisburc in mieze zornade cul tren. Cun dutis lis lineis si pues puartâ lis bicicletis, miôr fasint prenotazion.
Dal plaçâl storic de stazion di Salisburc si pedale viers il centri, passant in bande de catedrâl, disot il cjistiel e dilunc la splendide place centrâl.
Si scomence in plan e in mancul di 20km si è za al camping. Un riscjaldament pes zornadis ch'à vegnin.
Îr si son viodûts tancj tocs dal Alpe Adrie tra valadis e culinis stant in tren. Vuê si lis fâs al contrari, cjapant cuote in siele. La prime metât e je sui versants de valade dal flump Salzach, no in val. Si vâ sù fintremai al Pas di Lueg. Di lì al è un toc su strade.
La salide al paîs di Werfen e segne di sedi a mieç de tape. Cumò si vâ indenant cun pendence lizere e costante fin insom.
Ben pò, chei a lì denant a son i Taurs, e o vin di lâ di chê altre bande. Cheste zornade e je plui curte di chês altris par vie de rive sù di fâ. Schirie di sù e jù al inizi fintremai ae prime galarie. Daspò, dut cuiet fin dapît a Bad Gastein.
A lì la scalade plui dificile di dut il viaç pe concuiste dai salts da l'aghe. Plui cuiete, la salide e vâ indenant fin se stazion dal tunnel dai Taurs, lì che il tren nus puartarà di chê altre bande dai monts.
La tape e si slungje par podê rivâ al cjâf lûc de Carinzie. Saltarel al inizi, come a sedi tes culinis, al puarte ae dissese lungje in bande dal Drau fin ae citât. E je la zornade plui lungje dal viaç cui siei 77km. Distes, nol è nuie di difficil e si vâ indenant par di plui su ciclabilis.
Vuê si passe il confin e si torne in Friûl. Une salide cence nuie di difficil, par dî come pendence, e fâs cjapâ cuote pe seconde e ultime grande salide dal Alpe Adrie. Il confin Austrie - Italie al è il passaç di stât, Cjamros al è il passaç ae rive jù e al toc plui biel dal Alpe Adrie.
Si vâ indenant su puints e galariis, viste sul Fele e lis Juliis. In fin dai fats, di côr di rive jù par cjapâ timp e podê cjalâ ator.
Une altre tape lungje cui siei 76km e i saltarei tes nestris culinis. Distes, si rive a lâ vie svelts podint fermâsi a viodi puescj storics come Venzon e Udin, glesiis e cjistiei dut dilunc la ciclabil e cence gjavâ nuie ae nature che si viôt.
Tal svilup al è un biel toc su asfalt; che al pues no plasê ma che nus lasse scurtâ (come km e come timp) la tape.
Ultime zornade, ma no par impuartance. O ben, cheste tape e passe pai cjamps furlans dilunc vilis storichis, lis muris di Palme, il cjistiel di Strassolt par rivâ ae seconde citât storiche Unesco de zornade: Aquilee.
Nol è avonde? Ancjemò cualchi km te marine par sedi tal centri storic di Grau, la vecje Vignesie. E po il mâr: o sin cumò in cime al Mâr Adriatic.
Dut il toc in mont al pues sedi sierât dilunc l'Inviêr pe nêf. La part te plane e pues sedi masse cjalde tai mês di Lui e Avost.
L'Alpe Adrie al è un dai viaçs plui sempliçs inte librarie di MTB Friuli: daspò lis tapis a son lungjis, in dut il viaç nol è nuie di difficil di fâ fevelant di tecniche.
Fotos e filmâts dal zîr
Esempli di un toc di ciclabil: strade blancje cun lens ator.
Viste sui Taurs, mission de seconde e tierce zornade.
Di chê altre bande de galarie, dai Taurs.
In Carinzie te cuarte zornade la val e je plui largje e in dissese.
Il toc tal Cjanâl dal Fiêr, la part stupende de cuinte zornade.
Mix di puints e galariis, vals e salts da l'aghe.
Une des tantis deviazions di MTB Friuli, par di plui intai centris storics.
Salide al Cjistiel di Udin.