La Val dal Bartul e je un dai puescj miôr tignûts da la nestre Regjon e lant sù pe strade de valade si lu viôt par ben. Il zîr de pagjine al passe pe Siele dal Bartul e al va in Austrie, fasint la valade Feinstritz fintremai al paîs, che al à il stès non. Si torne sù fin al rifugjo Osternig/Siele di Bistrize su par une strade cuntun panorame cal vâl la pene. Daspò un zig-zet fra Italie e Austrie cal puarte ae Malghe di Acumize, li ca tache la rive jù sul troi e po su stradele cun tocs li che si côr pardabon.

Il zîr al è metût te categorie 'Miscliçot': par dile dute, un tic di pedalade su asfalt al è, ma dome tal paîs di Cjamparòs, par passâ de strade de Val dal Bartul (rive sù) al troi CAI 508 (rive jù). Dut il rest al è su tiere: strade blancje e troi.
Rivâts a Cjamparòs, li ca no son fastidis a lassâ la machine, si partìs pe Val dal Bartul. Dopo cualchi centenâr di metris di asfalt si passe ae strade blancje ca je ben tignude, a no tire sù tant: al è un plasê lâ sù.
In curt si rive ai larcs Prâts dal Bartul, li ca son tancj stavui, ancjemò cun int ca ju dopre; si travierse dute la Val dal Bartul par 6 km su strade blancje cun pôc di rive sù, rivant po a une piçule salidute ca puarte ae Siele dal Bartul, confin Italie - Austrie. La strade e je biele, a no tire sù tant, un bon font, sierade a lis machinis di miege valade in sù e a passe in bande al flump par cuasi dut il percors.
Passât il confin, stant atents a un pâr di beorcjis cu la strade principâl, si fâs prime un piçul traviers in plan e daspò la rive jù, ca fâs dut il Feistritz Graben te tiere austriache. La rive jù e je su strade blancje, che si la gjolt, prime a va jù tant cun cualchi tornant e daspò e va vie a flanc dal Feinstritz Bach, tal sot de valade. La strade e à tocs ca tirin jù e dulà che si viôt ben, tocs li che si côr di mancul ma ca son drets, puints e il flump in bande, propite dongje.
Subit prin de fin de valade si svolte a çampe, lassant la strade principâl, passant su un puintut e lant indenant viers il paîs di Feinstritz.

Rivâts al paîs si svolte di gnûf a çampe, cjapant la strade ca mene sù al Feinstritzer Alm - Wh. Oisternig, prime su asfaltât e po su strade blancje.
La rive sù cumò a mene di plui di chê di prime, si va sù svelts in altece. Il font de strade al è bon, tant ca van sù cu lis machinis. In mancul di 8km si va sù dai 640 m ai 1720 m, soredut tal prin toc tal versant Nord dal Mont dal Osternig. Di che altre bande si viodin dai panoramis bielissims su la valade dal Gail e lis sôs montagnis a Nord e su lis nestris montagnis a Sud.
Rivâts al rifugjo e al paîsut cal stâ a flanc, sul confin Italie - Austrie, si svolte a çampe, cjapant la stradele ca puarte ae Siele Pleccie (1616m) e ca va sù ae Malghe si Acumize (1712m).
Gjoldût il panorame che si viôt li de malghe si cjape il troi CAI numar 508. Il prin toc al è un sù e jù di traviers viers la Baite Cima Muli, li invezit a tache la vere rive jù, ca tire jù pardabon e che merete.
Si travierse un toc di bosc cun piçulis voltis indaûr ben scavadis, che plasin a chei de mountain bike. Si pues becâ ancje cualchi tronc colât sul troi, stait atents. Si rive al Rifugjo Forestâl Cima Muli, li che si pues gjoldi un biel panorame e polsâ un lamp. Cumò la rive jù a passe a une strade blancje, plui largje e cun tocs cul font in glerie e altris cul font in ciment (o alc che timp fa al jere).
La rive jù, ancje sa je su strade, e à bielis pendencis e al è un lamp cjapâ corse. A nol è dificil fâle, ma a coventin buinis smuarsis (che si scjaldin ae svelte!) e di stâ atents, soredut ai traviers pe ploe e pes voltis in glerie che si sbrisse. La strade e je une sole e a rive jù drete parsore Cjamparòs, dongje dal parc.

Il zîr al è in dut di 32km cun 1550m di rive sù, fats in trê tocs.
Il moment miôr e je la Sierade: e je tante int li vie pe la Istât, ancje se chest al cjape dome lis rivis sù. Il panorame, i tocs tal bosc e il fat che dut al è come cal jere agns indaûr al è perfet pe Sierade.